خیرپور میں منکی پاکس کے کیسز میں اضافہ، عالمی ادارہ صحت کی ویکسین فراہم کرنے کی پیشکش

خیرپور: عالمی ادارہ صحت نے خیرپور میں منکی پاکس کے بڑھتے کیسز کے پیش نظر ویکسین فراہم کرنے کی پیشکش کر دی ہے، جبکہ بیماری کے دیگر اضلاع تک پھیلنے کی اطلاعات بھی سامنے آ رہی ہیں۔

محکمہ صحت کے مطابق ویکسین ابتدائی طور پر صرف ہائی رسک گروپس اور ہیلتھ ورکرز کو فراہم کی جائے گی تاکہ بیماری کے پھیلاؤ کو مؤثر طریقے سے روکا جا سکے۔

صورتحال کے پیش نظر محکمہ صحت سندھ نے تمام اسپتالوں میں 24 گھنٹے معلوماتی ڈیسک قائم کرنے کی ہدایت جاری کر دی ہے، جبکہ ریسکیو 1122 کے ساتھ فوری رابطے اور ریفرل سسٹم کو یقینی بنانے کا حکم بھی دیا گیا ہے۔

ڈی جی ہیلتھ سندھ نے ہسپتالوں میں ایم پاکس رسپانس یونٹس قائم کرنے کی ہدایت کی ہے تاکہ متاثرہ مریضوں کو فوری طبی سہولیات فراہم کی جا سکیں۔

محکمہ صحت کے مطابق نوزائیدہ بچوں میں منکی پاکس سے اب تک 7 اموات رپورٹ ہو چکی ہیں، جس کے بعد صورتحال کو مزید سنجیدگی سے مانیٹر کیا جا رہا ہے۔

پس منظر:

 منکی پاکس ایک وائرل بیماری ہے جو قریبی جسمانی رابطے کے ذریعے پھیلتی ہے۔ حالیہ مہینوں میں مختلف خطوں میں اس کے کیسز میں اضافہ دیکھا گیا ہے، جس کے باعث عالمی ادارہ صحت اور مقامی حکام حفاظتی اقدامات اور ویکسینیشن کے ذریعے اس کے پھیلاؤ کو روکنے کی کوششیں کر رہے ہیں۔