اسلام آباد: نائب وزیراعظم و وزیر خارجہ محمد اسحاق ڈار نے پاکستان گورننس فورم 2026 سے خطاب کرتے ہوئے کہا ہے کہ تیزی سے بدلتے عالمی نظام میں پاکستان کی خارجہ پالیسی نئی جہتوں کے ساتھ آگے بڑھ رہی ہے، تاہم قومی خودمختاری، سلامتی اور مفادات کا تحفظ بدستور اولین ترجیح ہے۔
انہوں نے کہا کہ پاکستان امن، مکالمے اور سفارتکاری کے فروغ کے لیے پرعزم ہے۔ جنوبی ایشیا میں پائیدار امن کو مسئلہ جموں و کشمیر کے منصفانہ حل سے مشروط قرار دیتے ہوئے انہوں نے زور دیا کہ یہ حل اقوام متحدہ کی سلامتی کونسل کی قراردادوں اور کشمیری عوام کے حقِ خودارادیت کے مطابق ہونا چاہیے۔
وزیر خارجہ نے کہا کہ پاکستان عالمی سطح پر اپنی اسٹریٹجک شراکت داریوں کو مضبوط بنا رہا ہے۔ چین کے ساتھ ہر موسم کی آزمودہ دوستی کو مزید گہرا کیا جا رہا ہے جبکہ امریکہ کے ساتھ تعلقات کو نئی جہت دی جا رہی ہے۔ اس کے علاوہ مشرقِ وسطیٰ، وسطی ایشیا اور آسیان ممالک کے ساتھ روابط کو بھی وسعت دی جا رہی ہے۔
انہوں نے بتایا کہ پاکستان کو 2025-26 کے لیے United Nations Security Council کی رکنیت 182 ووٹوں سے حاصل ہوئی، جہاں پاکستان پرامن تنازعات کے حل، شہریوں کے تحفظ، انسداد دہشت گردی اور فلسطین کے لیے 1967 سے قبل کی سرحدوں پر مبنی دو ریاستی حل کی حمایت جاری رکھے گا، جس میں القدس الشریف کو دارالحکومت تسلیم کیا جائے۔
اسحاق ڈار نے کہا کہ اقتصادی سفارتکاری اور ماحولیاتی اقدامات پاکستان کی عالمی حکمت عملی کا اہم حصہ ہیں۔ تجارت، آئی ٹی، معدنیات، حلال صنعت اور کلائمیٹ فنانس سمیت مختلف شعبوں میں مربوط حکومتی حکمت عملی کے تحت پائیدار اور مستحکم ترقی کا حصول ترجیح ہے۔
