نیویارک: ٹیکنالوجی کمپنی Apple Inc. کے پہلے فولڈ ایبل آئی فون سے متعلق ایک نئی لیک میں دعویٰ کیا گیا ہے کہ یہ ڈیوائس ستمبر 2026 میں متعارف کرائی جا سکتی ہے۔
رپورٹس کے مطابق فولڈ ایبل آئی فون کو ممکنہ طور پر iPhone 18 Pro سیریز کے ساتھ پیش کیا جائے گا اور اسے "الٹرا” ماڈل کے طور پر لانچ کیے جانے کا امکان ہے، جو کمپنی کا ایک پریمیئم اسمارٹ فون ہوگا۔
لیک میں بتایا گیا ہے کہ یہ فون کتاب کی طرح فولڈ ہونے والے ڈیزائن کے ساتھ آئے گا۔ اس کا بیرونی ڈسپلے 5.5 انچ جبکہ اندرونی اسکرین 7.8 انچ ہوگی، جو فولڈ کھولنے پر نمایاں ہوگی۔
مزید رپورٹس کے مطابق کمپنی اس ڈیوائس کے لیے انتہائی پتلا گلاس اور لیکوئیڈ میٹل استعمال کرنے پر کام کر رہی ہے تاکہ اسے زیادہ پائیدار بنایا جا سکے، جبکہ کچھ لیکس میں 3D پرنٹڈ پرزہ جات کے استعمال کا بھی عندیہ دیا گیا ہے۔
یہ فولڈ ایبل آئی فون غیر معمولی طور پر پتلا ہوگا—کھلنے کے بعد اس کی موٹائی 4.5 سے 4.8 ملی میٹر جبکہ فولڈ ہونے پر تقریباً 9.6 ملی میٹر ہونے کا امکان ظاہر کیا گیا ہے۔
رپورٹس کے مطابق یہ ڈیوائس روایتی آئی فونز سے بالکل مختلف تجربہ فراہم کرے گی، خاص طور پر ویڈیوز، گیمنگ اور ملٹی ٹاسکنگ کے حوالے سے نمایاں بہتری متوقع ہے۔ فون میں ممکنہ طور پر A20 Pro چپ اور 5500mAh بیٹری دی جائے گی۔
کیمرا ڈیزائن کے بارے میں کہا جا رہا ہے کہ یہ iPhone Air سے مشابہ ہوگا، جس میں دو کیمرے، مائیکرو فون اور فلیش شامل ہوں گے، جبکہ مجموعی شکل میں یہ کسی حد تک آئی پیڈ پرو جیسا تاثر دے سکتا ہے۔
