پشاور: تحریکِ انصاف (پی ٹی آئی) اب بھی کالعدم تحریک طالبان پاکستان (ٹی ٹی پی) کے ساتھ مذاکرات کی حمایت کر رہی ہے، حالانکہ ماضی میں کئی امن معاہدے ناکام ہو چکے ہیں۔
صوبائی کابینہ سے خطاب کرتے ہوئے وزیراعلیٰ سہیل آفریدی نے کہا کہ خیبرپختونخوا میں کسی بھی آپریشن کی اجازت نہیں دی جائے گی اور فوجی کارروائیاں کسی بھی مسئلے کا حل نہیں ہیں۔ انہوں نے مزید کہا کہ امن بند کمروں میں کیے گئے فیصلوں سے قائم نہیں ہو سکتا اور امن جرگہ نے بھی آپریشن کو مسترد کیا تھا۔
انہوں نے کہا، "اگرچہ صوبے میں آپریشن کی تیاریاں کی جا رہی ہیں، تاہم کوئی بھی فرد یا ادارہ زور زبردستی اپنا فیصلہ خیبرپختونخوا پر مسلط نہیں کر سکتا۔”
پاکستان نے ٹی ٹی پی اور منسلک عسکریت پسند گروہوں کے ساتھ متعدد امن معاہدے کیے، لیکن کوئی بھی پائیدار امن قائم کرنے میں کامیاب نہ ہو سکا۔ ماضی میں عسکریت پسند رہنماؤں نیک محمد، بیت اللہ محسود، حافظ گل بہادر، صوفی محمد، مولانا فضل اللہ، فقیر محمد اور منگل باغ کے ساتھ معاہدے کیے گئے، لیکن یہ چند ماہ سے زیادہ برقرار نہ رہ سکے۔
پہلا امن معاہدہ اپریل 2004 میں جنوبی وزیرستان کے علاقے شکئی میں نیک محمد وزیر کے ساتھ طے پایا، جس کے تحت حکومت نے قیدی رہا کیے اور جائیداد کے نقصان کا معاوضہ دیا، جبکہ نیک محمد نے غیر ملکی جنگجوؤں کی رجسٹریشن اور سرحد پار حملے روکنے کا وعدہ کیا تھا۔
—
