نائب وزیراعظم اسحاق ڈار کے ایران اور ازبکستان کے وزرائے خارجہ سے ٹیلی فونک رابطے، علاقائی پیش رفت اور دوطرفہ تعاون پر تبادلۂ خیال

اسلام آباد: نائب وزیراعظم اور وزیر خارجہ سینیٹر محمد اسحاق ڈار نے آج اسلامی جمہوریہ ایران اور جمہوریہ ازبکستان کے وزرائے خارجہ سے علیحدہ علیحدہ ٹیلی فونک رابطے کیے۔ گفتگو کے دوران خطے کی موجودہ صورتحال، دوطرفہ تعلقات اور باہمی تعاون کے مختلف پہلوؤں پر تفصیلی تبادلۂ خیال کیا گیا۔

ایران کے وزیر خارجہ سید عباس عراقچی سے بات چیت میں ایران میں موجودہ پیش رفت پر غور کیا گیا۔ نائب وزیراعظم/وزیر خارجہ نے مسلسل مکالمے اور سفارتی روابط کی اہمیت پر زور دیتے ہوئے قریبی رابطہ برقرار رکھنے پر اتفاق کیا۔

دوسری جانب، ازبکستان کے وزیر خارجہ بختیار سعیدوف سے گفتگو کے دوران پاکستان اور ازبکستان کے درمیان مضبوط اور فروغ پاتے دوطرفہ تعلقات کا اعادہ کیا گیا۔

دونوں وزرائے خارجہ نے سیاسی، معاشی اور ثقافتی شعبوں میں تعاون کو مزید وسعت دینے، اعلیٰ سطحی قیادت کے تبادلوں کے ذریعے روابط مضبوط بنانے اور جاری منصوبوں پر پیش رفت کے لیے قریبی رابطے جاری رکھنے پر اتفاق کیا۔فریقین نے باہمی مفاد کے امور پر مسلسل رابطہ اور تعاون کو فروغ دینے کے عزم کا اعادہ کیا۔