کیلیفورنیا:گوگل نے امریکہ کے شہر سانتا باربرا میں اپنی تنصیب میں دنیا کے طاقتور ترین کوانٹم کمپیوٹرز میں سے ایک، ’ولو‘، متعارف کروا دیا ہے۔ یہ جدید نظام گوگل کے کوانٹم اے آئی لیب نے تیار کیا ہے اور اس کا مقصد ایسے پیچیدہ سائنسی مسائل حل کرنا ہے جنہیں روایتی کمپیوٹرز محدود وقت میں حل کرنے سے قاصر ہیں۔
ولو روایتی کمپیوٹرز سے بالکل مختلف ہے، اس میں نہ کی بورڈ ہے اور نہ مانیٹر، بلکہ یہ جھاڑ نما ڈھانچے میں نصب کیا گیا ہے اور تقریباً مطلق صفر درجہ حرارت پر رکھا جاتا ہے۔ اس کے مرکز میں 105 کیوبٹس پر مشتمل کوانٹم چِپ موجود ہے، جو معلومات کی پروسیسنگ میں عام کمپیوٹرز کے مقابلے میں کئی گنا تیز ہے۔ گوگل کے مطابق ولو بعض پیچیدہ حسابی عمل چند منٹوں میں انجام دے سکتا ہے، جبکہ دنیا کے تیز ترین روایتی کمپیوٹرز کو یہ کام کرنے میں کھربوں سال لگ سکتے ہیں۔
گوگل کوانٹم اے آئی کے چیف سائنٹسٹ ہارتمٹ نیون کے مطابق ولو اس بات کا عملی ثبوت ہے کہ کوانٹم کمپیوٹر ایسے مسائل حل کر سکتا ہے جو کلاسیکل کمپیوٹرز کے بس سے باہر ہیں۔ کوانٹم کمپیوٹنگ طبی تحقیق، توانائی کے مؤثر استعمال، زراعت اور موسمیاتی ماڈلنگ جیسے شعبوں میں کارآمد ہو سکتی ہے، جہاں پیچیدہ سمیولیشنز کی ضرورت ہوتی ہے۔
ولو نے پہلے ہی اہم سنگ میل عبور کر لیے ہیں، جن میں کوانٹم ایکوز الگورتھم جیسے بینچ مارک مسائل شامل ہیں، جو مالیکیولز کے رویے کی نقل کرنے میں مدد دیتے ہیں اور طبی تحقیق، خاص طور پر ایم آر آئی سے متعلق علاج، میں استعمال ہو سکتے ہیں۔
گوگل کے مطابق ولو میں جدید ترین ایرر کریکشن تکنیکیں شامل ہیں اور یہ دنیا کا پہلا کوانٹم سسٹم ہے جس میں قابلِ تکرار ایرر کریکشن کی صلاحیت موجود ہے۔ کیوبٹس کی شور کے لیے غیر معمولی حساسیت کے باعث ایرر کریکشن کو طویل عرصے سے کوانٹم کمپیوٹنگ کی ترقی میں سب سے بڑی رکاوٹ سمجھا جاتا رہا ہے۔
ماہرین کے مطابق طویل المدتی ہدف کوانٹم سسٹمز کو ایک ملین کیوبٹس تک پہنچانا ہے۔ برطانیہ کے نیشنل کوانٹم ٹیکنالوجی پروگرام کے پیٹر نائٹ نے کہا کہ ولو ایرر کریکشن اور کارکردگی کے حوالے سے بڑی پیش رفت کی نمائندگی کرتا ہے، حالانکہ زیادہ تر کوانٹم کمپیوٹرز اب بھی تجرباتی مرحلے میں ہیں۔
ولو کے ذریعے کوانٹم کمپیوٹنگ کے شعبے میں نہ صرف تحقیق کو تیز رفتار ملے گی بلکہ پیچیدہ سائنسی اور صنعتی مسائل کے حل کے نئے دروازے بھی کھلیں گے۔
