کراچی: وفاقی حکومت کے نومبر 2025 کے قرض کی تفصیلات سامنے آگئیں۔سٹیٹ بینک کے مطابق وفاقی حکومت نے نومبر میں مجموعی طور پر 573 ارب روپے قرض لیا، جس کے بعد حکومتی کل قرض 77,543 ارب روپے تک پہنچ گیا۔
سٹیٹ بینک کی رپورٹ کے مطابق نومبر میں حکومت نے مقامی سطح سے 653 ارب روپے قرض حاصل کیا، جب کہ بیرونی قرضوں کی مد میں 79 ارب روپے کی ادائیگی کی گئی۔
قرض کی صورتحال پر غور کیا جائے تو رواں مالی سال کے ابتدائی پانچ ماہ میں کل قرض میں 345 ارب روپے کی کمی دیکھنے میں آئی ہے۔ اس دوران بیرونی قرض 492 ارب روپے کم ہوا جبکہ مقامی قرض 147 ارب روپے بڑھا۔
ماہرین کے مطابق حکومت کی مالی پالیسیوں اور قرضوں کی ساخت پر مسلسل نظر رکھنا ملکی معیشت کی پائیداری کے لیے اہم ہے، کیونکہ بڑھتے ہوئے مقامی قرض اور کم ہوتے بیرونی قرض کے اثرات مالی استحکام پر نمایاں پڑ سکتے ہیں۔
