اسلام آباد: حکومت نے کراچی کو بجلی فراہم کرنے والی کمپنی کے الیکٹرک کو مقامی ذرائع سے گیس فراہم کرنے کا فیصلہ کرلیا ہے، جس کے نتیجے میں گیس کی تقسیم کے نظام پر دباؤ بڑھنے کا امکان ظاہر کیا جا رہا ہے۔
وزارت توانائی کے ذرائع کے مطابق اس فیصلے کے تحت سوئی سدرن گیس کمپنی کے سسٹم سے یومیہ 100 ایم ایم سی ایف ڈی (ملین مکعب فٹ) گیس کے اخراج کا خدشہ ہے، جس سے ملک کے جنوبی حصوں میں گیس کی قلت پیدا ہو سکتی ہے۔
ذرائع کا کہنا ہے کہ گیس کی اس ممکنہ کمی کے باعث گھریلو اور صنعتی صارفین کے لیے گیس لوڈ مینجمنٹ یا شیڈول نافذ کیے جانے کا امکان ہے، خاص طور پر سردیوں یا طلب میں اضافے کے دوران صورتحال مزید سنگین ہو سکتی ہے۔
حکام کے مطابق کے الیکٹرک کو مقامی گیس کی فراہمی کا مقصد بجلی کی پیداوار کو مستحکم بنانا اور کراچی میں لوڈشیڈنگ کے مسائل پر قابو پانا ہے، تاہم اس کے ساتھ ساتھ گیس کی منصفانہ تقسیم ایک بڑا چیلنج بن سکتی ہے۔
توانائی ماہرین کا کہنا ہے کہ اس فیصلے کے اثرات کو متوازن رکھنے کے لیے حکومت کو متبادل انتظامات اور گیس سپلائی کے دیگر ذرائع پر بھی توجہ دینا ہوگی تاکہ کسی ایک شعبے کو فائدہ دینے سے دوسرے شعبے متاثر نہ ہوں۔
