اسلام آباد:پاکستان کی قدیم تہذیبوں کو محفوظ بنانے اور عالمی سطح پر متعارف کروانے کے لیے اسلام آباد میوزیم میں جدید ڈیجیٹل گندھارا گیلری کا افتتاح کر دیا گیا ہے، جہاں زائرین کو گندھارا تہذیب کا ورچوئل سفر کرنے کا موقع ملتا ہے۔
یہ گیلری مصنوعی ذہانت، 3D ٹیکنالوجی اور ورچوئل ماحول کے ذریعے گندھارا تہذیب کی تاریخ کو زندہ کرتی ہے اور تاریخ شیشے کے پیچھے حقائق کے روپ میں پیش کی جاتی ہے۔ گیلری کے قیام میں کوریا ہیریٹیج ایجنسی، محکمہ آثارِ قدیمہ پاکستان اور نیشنل ہیریٹیج اینڈ کلچر ڈویژن کا اشتراک رہا ہے۔
گیلری میں داخل ہوتے ہی زائرین خود کو گندھارا دور میں محسوس کرتے ہیں، جہاں وہ قدیم فنون، مذہبی آثار، اور ثقافتی روایات کا تجربہ کر سکتے ہیں۔ یہ ورچوئل تجربہ نہ صرف ملکی بلکہ غیرملکی سیاحوں، طالبعلموں اور محققین کے لیے بھی معلوماتی اور تعلیمی اہمیت کا حامل ہے۔
*اسلام آباد میں گندھارا تہذیب کا پہلا ورچوئل سفر*
pic.twitter.com/h7TmTWkatG— Raja Shafqat Khan (@RajaSK142) January 12, 2026
حکومت پاکستان نے اس اقدام کے ذریعے ملک کی قدیم تہذیبی شناخت کو آئندہ نسلوں کے لیے محفوظ بنانے کا عزم ظاہر کیا ہے۔ عرب نیوز سمیت دیگر بین الاقوامی ذرائع نے بھی اس منصوبے کی ستائش کی ہے اور اسے پاکستان کی ثقافتی اور تاریخی میراث کو عالمی سطح پر اجاگر کرنے کا اہم قدم قرار دیا ہے۔یہ گیلری تاریخ کے طالبعلموں کے لیے نہایت مفید ہے اور اس سے پاکستان کی عالمی شناخت کو مزید بہتر بنانے میں مدد ملے گی۔
