اسلام آباد: پاکستان ٹیلی کمیونیکیشن اتھارٹی (پی ٹی اے) نے کیبل آپریٹرز کو انٹرنیٹ سروس فراہم کرنے کے لیے لائسنس کے اجرا کا اعلان کر دیا ہے۔
پی ٹی اے کے مطابق، خواہشمند کیبل آپریٹرز اپنی درخواستیں ادارے کے آن لائن پورٹل پر جمع کرا سکتے ہیں، اور جن افراد کے پاس پہلے سے پیمرا کا کیبل لائسنس موجود ہوگا، انہیں فوقیت دی جائے گی۔
پی ٹی اے نے بتایا کہ کلاس لائسنس10 سال کی مدت کے لیے جاری کیا جائے گا، اور ابتدائی لائسنس کے حصول کے لیے پہلی بار 3 لاکھ روپے فیس ادا کرنا ہوگی۔
اس اقدام کو کیبل آپریٹرز کی سہولت کے ساتھ ساتھ صارفین کے لیے اضافی خدمات فراہم کرنے اور روزگار کے مواقع بڑھانے کے حوالے سے اہم قرار دیا جا رہا ہے۔ چیئرمین کیبل آپریٹرز ایسوسی ایشن خالد آرائیں نے چیئرمین پی ٹی اے حفیظ الرحمن اور انتظامیہ کا شکریہ ادا کرتے ہوئے کہا کہ لائسنس کے اجرا سے کیبل آپریٹرز اب اپنے صارفین کو **انٹرنیٹ سہولت بھی فراہم کر سکیں گے۔
خالد آرائیں کی قیادت میں کیبل آپریٹرز ایسوسی ایشن نے چند ماہ قبل یہ تجویز پی ٹی اے کے سامنے رکھی تھی، جسے پی ٹی اے نے قبول کرتے ہوئے اس پر عمل درآمد شروع کر دیا۔ ایسوسی ایشن نے پی ٹی اے کے تعاون کی یقین دہانی بھی کرائی ہے۔
پی ٹی اے کا یہ اقدام ڈیجیٹل خدمات کو بڑھانے، صارفین کو اضافی سہولت فراہم کرنے اور کیبل آپریٹرز کے لیے روزگار کے مواقع بڑھانے کے لیے اہم قدم سمجھا جا رہا ہے۔
