اسلام آباد اور گردونواح میں زلزلے کے شدید جھٹکے، شدت 5.8 ریکارڈ
اسلام آباد: وفاقی دارالحکومت اسلام آباد اور اس کے گردونواح میں پیر کی دوپہر زلزلے کے شدید جھٹکے محسوس کیے گئے، جس کے باعث شہریوں میں خوف و ہراس پھیل گیا اور لوگ گھروں اور دفاتر سے باہر نکل آئے۔
زلزلہ پیما مرکز کے مطابق ریکٹر اسکیل پر زلزلے کی شدت 5.8 ریکارڈ کی گئی، جبکہ اس کا مرکز کشمیر کا شمال مغربی علاقہ تھا۔ زلزلے کی گہرائی 10 کلومیٹر ریکارڈ کی گئی ہے۔ اس کے علاوہ ہنزہ اور ملحقہ علاقوں میں بھی زلزلے کے جھٹکے محسوس کیے گئے۔
ابتدائی اطلاعات کے مطابق زلزلے کے باعث فوری طور پر کسی جانی یا مالی نقصان کی کوئی اطلاع موصول نہیں ہوئی ہے، تاہم متعلقہ ادارے صورتحال کا جائزہ لے رہے ہیں۔
