کراچی: قومی ائیر لائن (PIA) کے ائیرکرافٹ انجینئرز کی ہڑتال کے باعث پروازوں کا شیڈول مسلسل متاثر ہورہا ہے۔ آج ہڑتال کے چوتھے روز مزید 14 پروازیں منسوخ کردی گئیں جس کے بعد مجموعی طور پر 39 پروازیں منسوخ ہوچکی ہیں۔انجینئرز کی ہڑتال کے سبب پروازوں میں شدید تاخیر کا سلسلہ بھی جاری ہے اور تاخیر کا دورانیہ اب 13 گھنٹے تک پہنچ گیا ہے۔
ذرائع کے مطابق کراچی، لاہور، اسلام آباد، پشاور، فیصل آباد اور ملتان سے روانہ ہونے والی متعدد اندرون و بیرون ملک پروازیں آپریشنل عملے کی کمی کے باعث منسوخ کی گئیں۔ائیرلائن حکام کا کہنا ہے کہ ہڑتال کے باعث فلائٹ آپریشن بری طرح متاثر ہے جبکہ مسافروں کو متبادل پروازوں میں ایڈجسٹ کرنے کی کوشش کی جا رہی ہے۔
ائیرکرافٹ انجینئرز کی تنظیم نے تنخواہوں میں اضافہ نہ ہونے اور مراعات میں کٹوتی کے خلاف ہڑتال شروع کی تھی۔گزشتہ روز سوسائٹی آف ائیرکرافٹ انجینئرز کے صدر اور سیکرٹری کو ملازمت سے برطرف کیے جانے کے بعد احتجاج میں مزید شدت آگئی ہے۔
ذرائع کا کہنا ہے کہ انجینئرز نے مطالبات تسلیم نہ ہونے کی صورت میں غیر معینہ مدت تک ہڑتال جاری رکھنے کا اعلان کیا ہے، جبکہ انتظامیہ نے احتجاج کو “غیر قانونی” قرار دیتے ہوئے جلد معمول کی بحالی کا عندیہ دیا ہے۔
ماہرین کا تجزیہ:
ہوابازی کے ماہرین کا کہنا ہے کہ انجینئرز کی ہڑتال سے نہ صرف PIA کے مالی نقصانات میں اضافہ ہورہا ہے بلکہ پاکستان کی فضائی ساکھ بھی متاثر ہو رہی ہے۔
سابق ایوی ایشن افسر کمرشل پائلٹ خاور فاروقی کے مطابق، “انجینئرز قومی ایئر لائن کا ریڑھ کی ہڈی ہیں، ان کے ساتھ مذاکراتی عمل میں تاخیر ادارے کو آپریشنل بحران میں دھکیل سکتی ہے۔”
دوسری جانب، شہری ہوابازی کے مبصرین کا کہنا ہے کہ اگر یہ ہڑتال مزید طول پکڑ گئی تو بیرونِ ملک پروازوں کی سکیورٹی کلیئرنس میں بھی مسائل پیدا ہو سکتے ہیں۔
