پی آئی اے کا برطانیہ کے لیے فضائی آپریشن 5 سال بعد بحال، مانچسٹر کے لیے پہلی پرواز روانہ، وزیراعظم کی مبارکباد
اسلام آباد:پانچ سال کی معطلی کے بعد پاکستان انٹرنیشنل ایئرلائنز (پی آئی اے) نے برطانیہ کے لیے فضائی آپریشن بحال کر دیا ہے۔ اسلام آباد سے مانچسٹر کے لیے پہلی براہِ راست پرواز آج دن 12 بج کر 5 منٹ پر روانہ ہوئی۔
وزیرِ دفاع خواجہ محمد آصف نے پاکستان سے برطانیہ کے لیے پروازوں کے دوبارہ آغاز کا باضابطہ افتتاح کیا۔ اسلام آباد میں منعقدہ تقریب میں برطانوی ہائی کمشنر اور سیکرٹری دفاع سمیت دیگر اعلیٰ حکام نے شرکت کی۔
خواجہ آصف کا کہنا تھا کہ پی آئی اے کے روٹس دوبارہ بحال ہونا ایک تاریخی موقع ہے۔وزیر دفاع نے کہا کہ پی آئی اے پر عائد پابندی سے حکومت کو مالی نقصان ہوا، تاہم ادارے کا معیار اب بہتر کر لیا گیا ہے۔ فلائٹ آپریشن کی بحالی میں برطانوی ہائی کمشنر کا کلیدی کردار رہا۔
پانچ سال بعد PIA کی برطانیہ کیلئے پروازیں بحال..
اسلام آباد سے مانچسٹر جانے والی پہلی براہ راست پرواز PK-701 273 مسافروں کے ساتھ روانہ ہوئی۔ افتتاحی تقریب میں وزیر دفاع خواجہ آصف، سول ایوی ایشن اور برطانوی سفارتکار شریک تھے۔ ابتدائی طور پر ہفتے اور منگل کو دو پروازیں چلیں گی،… pic.twitter.com/oRHRygowOt— Mehwish Qamas Khan (@MehwishQamas) October 25, 2025
پی آئی اے کی پرواز پی کے 701 اسلام آباد سے ہفتے اور منگل کے روز مانچسٹر کے لیے روانہ ہوگی۔ بوئنگ 777 طیارے کے ذریعے 273 مسافر مانچسٹر جائیں گے۔پرواز برطانوی وقت کے مطابق شام 5 بجے مانچسٹر پہنچے گی اور واپسی پر شام 7 بجے روانہ ہو کر صبح 7 بجے اسلام آباد پہنچے گی۔پی آئی اے آئندہ مرحلے میں لندن کے لیے پروازوں کا آغاز بھی کرے گی۔
وزیراعظم شہباز شریف نے پی آئی اے کی اسلام آباد سے مانچسٹر براہ راست پروازوں کے آغاز پر پوری قوم، خصوصاً برطانیہ میں مقیم پاکستانیوں کو مبارکباد دی ہے۔وزیراعظم نے وزیرِ ہوابازی خواجہ آصف، سول ایوی ایشن اتھارٹی، پی آئی اے اور متعلقہ اداروں کے حکام کی کاوشوں کو سراہتے ہوئے کہا کہ ان کی محنت سے قومی ایئر لائن کی ساکھ بحال ہوئی ہے۔
شہباز شریف نے کہا کہ اللہ کے فضل و کرم سے پاکستان کا تشخص دنیا بھر میں دوبارہ بحال ہو رہا ہے۔ ماضی میں عائد پابندیوں کے باعث پی آئی اے کو نقصان پہنچا، تاہم کئی برس کی محنت کے بعد ادارے نے اپنا وقار دوبارہ حاصل کر لیا ہے۔
وزیراعظم شہباز شریف نے کہا کہ پی آئی اے کی براہ راست پروازوں سے برطانیہ میں مقیم پاکستانی کمیونٹی کو سہولت ملے گی اور دونوں ممالک کے تعلقات میں نئی مضبوطی آئے گی۔ان کا مزید کہنا تھا کہ پاکستان کے تمام اداروں میں اصلاحات اور بہتری کا عمل تیزی سے جاری ہے تاکہ ملک کو ترقی اور استحکام کی راہ پر گامزن کیا جا سکے۔
