اسلام آباد:نائب وزیر اعظم اور وزیر خارجہ سینیٹر اسحاق ڈار نے ایران کے وزیر خارجہ سید عباس عراقچی سے ٹیلی فونک گفتگو میں خطے کی بدلتی ہوئی صورتحال پر تشویش کا اظہار کیا، دونوں رہنماؤں نے پیش رفت پر رابطے میں رہنے پر اتفاق کیا۔
دفتر خارجہ کے مطابق نائب وزیر اعظم و وزیر خارجہ سینیٹر اسحاق ڈار نے ایرانی وزیر خارجہ سید عباس عراقچی سے ٹیلی فون پر گفتگو کی، جس میں خطے میں جاری پیش رفت اور مجموعی صورتحال پر تبادلہ خیال کیا گیا۔ اس موقع پر اسحاق ڈار نے موجودہ علاقائی حالات پر تشویش کا اظہار کرتے ہوئے امن و استحکام کی اہمیت پر زور دیا۔
گفتگو کے دوران دونوں وزرائے خارجہ نے اس بات پر اتفاق کیا کہ خطے میں ہونے والی تازہ پیشرفت پر قریبی رابطہ برقرار رکھا جائے گا اور حالات پر مسلسل مشاورت جاری رکھی جائے گی۔
دفتر خارجہ کے مطابق پاکستان خطے میں امن، استحکام اور سفارتی رابطوں کو فروغ دینے کے لیے علاقائی ممالک کے ساتھ مسلسل رابطے میں ہے اور موجودہ صورتحال پر قریبی نظر رکھے ہوئے ہے۔
