تہران: ایران کی اعلیٰ قومی سلامتی کونسل کے سیکرٹری علی لاریجانی نے واضح کیا ہے کہ ایران اپنی خودمختاری اور ہزاروں سالہ تہذیب کے دفاع کے لیے ہر حد تک جائے گا اور کسی بھی دباؤ یا دھمکی سے مرعوب نہیں ہوگا۔
انہوں نے کہا کہ ایران گزشتہ 300 برسوں میں کسی جنگ کا آغاز کرنے والا ملک نہیں رہا اور ہماری مسلح افواج نے ہمیشہ دفاعی حکمتِ عملی اپنائی ۔ “ہماری بہادر افواج نے کبھی جارحیت نہیں کی، لیکن اگر ہم پر جنگ مسلط کی گئی تو بھرپور جواب دیا جائے گا۔”
“لاگت کی پرواہ نہیں، دفاع ہر صورت یقینی بنائیں گے”
لاریجانی کا کہنا تھا کہ ایران اپنے دفاع کے لیے کسی بھی قیمت کی پرواہ نہیں کرے گا۔ انہوں نے کہا کہ دشمنوں کی غلط اندازہ آرائی انہیں بھاری پڑے گی اور وہ اپنے فیصلوں پر پچھتائیں گے۔
انہوں نے زور دیا کہ ایران نہ صرف موجودہ حالات کا مقابلہ کرنے کی صلاحیت رکھتا ہے بلکہ طویل مدتی جنگ کے لیے بھی تیار ہے۔ ان کے بقول، “ایران ہر محاذ پر ثابت قدم رہے گا، جبکہ امریکا ایسی طویل جنگ کے لیے تیار نظر نہیں آتا۔”
خطے میں کشیدگی مزید بڑھنے کا خدشہ
ایرانی عہدیدار کے اس بیان کو خطے میں بڑھتی ہوئی کشیدگی کے تناظر میں اہم قرار دیا جا رہا ہے۔ تجزیہ کاروں کے مطابق یہ بیان ممکنہ ردعمل اور آئندہ کی حکمتِ عملی کا واضح اشارہ ہے، جس سے مشرقِ وسطیٰ کی صورتحال مزید حساس ہو سکتی ہے۔
