نیویارک:امریکہ کی ریاست اوہائیو میں امریکی نائب صدر جے ڈی وینس کے گھر پر حملے کا واقعہ پیش آیا ہے۔ خوش قسمتی سے جے ڈی وینس اور ان کے اہلخانہ اس دوران گھر پر موجود نہیں تھے، تاہم پولیس نے ایک مشتبہ شخص کو موقع پر حراست میں لے لیا ہے اور تحقیقات کا عمل جاری ہے۔
ملزم گھر میں داخل ہونے میں ناکام رہا لیکن اس نے ایک کھڑکی کو نقصان پہنچایا اور گھر کے باہر موجود سیکریٹ سروس کی ایک گاڑی کو بھی نقصان پہنچانے کی کوشش کی۔ قانون نافذ کرنے والے ادارے ملزم کی سرگرمیوں اور حملے کے مقصد کی تحقیقات کر رہے ہیں۔
میڈیا رپورٹس کے مطابق نائب صدر جے ڈی وینس کو ان کی حیثیت کے باعث 24 گھنٹے سیکریٹ سروس کی سکیورٹی حاصل ہے، تاہم ان کے نجی گھر کی سکیورٹی کا لیول ان کے سفری شیڈول کے مطابق تبدیل ہوتا رہتا ہے۔ حکام کا کہنا ہے کہ سیکریٹ سروس نے واقعے کے بعد فوری طور پر حفاظتی اقدامات سخت کر دیے ہیں۔
یہ واقعہ امریکی سیاست میں ایک نایاب اور خطرناک پیش رفت کے طور پر دیکھا جا رہا ہے، جس نے نائب صدر اور اہلخانہ کی نجی حفاظت کے مسائل کو اجاگر کیا ہے۔
