اسلام آباد، راولپنڈی، لاہور، پشاور، گلگت، مظفرآباد اور دیگر شہروں میں آج زلزلے کے شدید جھٹکے محسوس کیے گئے۔ زلزلہ پیمانے کے مطابق اس زلزلے کی شدت 6.1 ریکارڈ کی گئی جبکہ زلزلے کی گہرائی 190 کلومیٹر تھی۔
اسلام آباد کے مختلف علاقوں میں اچانک جھٹکے محسوس کیے گئے، جس سے شہریوں میں خوف و ہراس پھیل گیا۔ راولپنڈی کے مختلف علاقوں میں بھی لوگ گھروں اور دفاتر سے باہر نکل آئے۔
پشاور، مردان اور نوشہرہ میں زلزلے کے جھٹکے محسوس کیے گئے، جبکہ گلگت اور مظفرآباد میں بھی شہریوں نے شدید لرزش محسوس کی۔ لاہور، اٹک، حسن ابدال اور ٹیکسلا میں زلزلے کے جھٹکے محسوس کیے گئے اور لوگ حفاظتی اقدامات کے لیے گھروں سے باہر نکل آئے۔
مانسہرہ، ہنگو، بٹگرام، دیر اور ملاکنڈ میں بھی زلزلے کے اثرات محسوس کیے گئے۔ فیصل آباد، چنیوٹ اور اوکاڑہ کے شہریوں نے بھی جھٹکوں کا تجربہ کیا۔
محکمہ موسمیات اور زلزلہ پیما مرکز نے شہریوں کو ہدایت کی ہے کہ وہ محفوظ مقامات پر رہیں اور متاثرہ علاقوں میں اضافی احتیاطی تدابیر اختیار کریں۔ ابتدائی رپورٹ کے مطابق فی الحال جانی نقصان کی اطلاع نہیں ملی، تاہم متاثرہ علاقوں میں حالات کا جائزہ لیا جا رہا ہے۔
