شاہد آفریدی کراچی چھوڑ کر مستقل اسلام آباد منتقل، ذاتی وجوہات اور ملکی بہتری کی خواہش کا اظہار

اسلام آباد: پاکستان کرکٹ کے مایہ ناز آل راؤنڈر اور سابق کپتان شاہد آفریدی کراچی چھوڑ کر مستقل بنیادوں پر اسلام آباد منتقل ہو گئے ہیں۔ اسلام آباد میں اپنی نئی رہائش گاہ پر روزنامہ جنگ سے خصوصی گفتگو کرتے ہوئے شاہد آفریدی نے اس فیصلے کی تصدیق کی۔

شاہد آفریدی کا کہنا تھا کہ وہ پاکستان کو ایک تیزی سے ترقی کرتا ہوا ملک دیکھنا چاہتے ہیں، تاہم اس کے لیے سب سے بنیادی عنصر پالیسیوں اور نظام میں تسلسل ہے۔ انہوں نے بتایا چند ذاتی وجوہات کی بنا پر انہوں نے کراچی چھوڑ کر اسلام آباد منتقل ہونے کا فیصلہ کیا۔

سابق کپتان نے کہا کہ پاکستان اور پاکستان کرکٹ نے انہیں دنیا بھر میں عزت، مقام اور شناخت دی، اور اب ان کی خواہش ہے کہ وہ کسی نہ کسی صورت ملک اور پاکستان کرکٹ کو کچھ واپس لوٹا سکیں۔

شاہد آفریدی نے واضح کیا کہ فی الحال سیاست میں آنے کا کوئی ارادہ نہیں، اور ان کے نزدیک جمہوری نظام کی مضبوطی کے لیے حکومت کو اپنی پانچ سالہ آئینی مدت مکمل کرنی چاہیے۔ انہوں نے چیف جسٹس اور آرمی چیف سمیت تمام اہم آئینی عہدوں پر فائز شخصیات کو بھی اپنی آئینی مدت پوری کرنے دینے پر زور دیا۔

انہوں نے انکشاف کیا کہ ماضی میں انہیں اہم حکومتی عہدوں کی پیشکش بھی کی گئی، تاہم وہ ہمیشہ ایسی ذمہ داریوں سے گریز کرتے رہے، کیونکہ محض رسمی عہدے ان کے لیے کوئی کشش نہیں رکھتے۔

شاہد آفریدی کا کہنا تھا کہ پالیسیوں، جمہوری عمل اور ریاستی اداروں میں تسلسل ہی ترقی کی مضبوط بنیاد بنتا ہے۔ اگر ادارے اپنی آئینی مدت مکمل کریں تو پالیسیاں برقرار رہتی ہیں اور ترقی کے ثمرات جلد عام آدمی تک پہنچتے ہیں۔