اسلام آباد: پریزیڈنٹ ٹرافی فرسٹ کلاس کرکٹ میں ایک ناپسندیدہ مگر تاریخی عالمی ریکارڈ قائم ہو گیا، جہاں ایس این جی پی ایل کی ٹیم انتہائی کم ہدف کے تعاقب میں ناکام رہی۔
پی ٹی وی اور ایس این جی پی ایل کے درمیان کھیلے گئے میچ میں پی ٹی وی نے فرسٹ کلاس کرکٹ کی تاریخ میں سب سے کم اسکور کا کامیاب دفاع کر کے نئی تاریخ رقم کر دی۔ میچ میں ایس این جی پی ایل کو فتح کے لیے محض 40 رنز کا ہدف ملا تھا، تاہم پوری ٹیم صرف 37 رنز بنا کر آؤٹ ہو گئی۔
اس طرح پی ٹی وی فرسٹ کلاس کرکٹ کی تاریخ میں کم ترین ہدف کا کامیابی سے دفاع کرنے والی ٹیم بن گئی۔ اس میچ کے ساتھ ہی 231 سال پرانا ریکارڈ بھی ٹوٹ گیا۔ اس سے قبل 1794 میں ایم سی سی کی ٹیم اولڈ فیلڈ کے خلاف 41 رنز کا ہدف حاصل کرنے میں ناکام رہی تھی۔کرکٹ ماہرین کے مطابق یہ واقعہ فرسٹ کلاس کرکٹ کی تاریخ کے حیران کن اور ناقابلِ یقین لمحات میں شمار کیا جا رہا ہے۔
