کراچی: سندھ بلڈنگ کنٹرول اتھارٹی (ایس بی سی اے) نے سابق صدر مملکت ڈاکٹر عارف علوی کا ڈینٹل کلینک ڈی سیل کر دیا ہے۔
سندھ ہائیکورٹ کے آئینی بینچ نے سابق صدر عارف علوی کے ڈینٹل کلینک کو سیل کیے جانے کے خلاف دائر توہین عدالت کی درخواست پر سماعت کی۔
سماعت کے دوران بیرسٹر علی طاہر نے عدالت کو آگاہ کیا کہ توہین عدالت کی درخواست دائر ہونے کے بعد ایس بی سی اے کی جانب سے ڈینٹل کلینک کو ڈی سیل کر دیا گیا ہے۔
بیرسٹر علی طاہر نے مؤقف اختیار کیا کہ کلینک ڈی سیل ہونے کے بعد وہ اس کیس میں مزید کارروائی نہیں چاہتے۔ عدالت نے درخواست گزار کا مؤقف ریکارڈ پر لیتے ہوئے ڈی جی ایس بی سی اے اور دیگر کے خلاف دائر توہین عدالت کی درخواست واپس لینے کی بنیاد پر نمٹا دی۔
