اسلام آباد: ترجمان دفتر خارجہ نے کہا ہے کہ بھارت کا دہشت گردی سے متعلق من گھڑت بیانیہ اور پاکستان کے خلاف جارحانہ رویہ حقائق کو چھپا نہیں سکتا۔ بھارت خطے میں امن کو مسلسل سبوتاژ کرنے والا کردار ادا کرتا آ رہا ہے۔
بھارت کا خطے میں عدم استحکام کا کردار
ہفتہ وار بریفنگ کے دوران ترجمان دفتر خارجہ نے کہا کہ بھارت نے بیرون ملک ماورائے عدالت قتل کیے، ہمسایہ ممالک کے اندرونی معاملات میں مداخلت کی اور کلبھوشن یادیو جیسے آپریٹوز کے ذریعے پاکستان میں دہشت گردی کی کارروائیاں کیں۔ انہوں نے کہا کہ بھارت نے مطلوب مجرموں کو محفوظ پناہ گاہیں فراہم کیں جبکہ بھارت میں اقلیتوں کو بڑھتی ہوئی ہراسانی اور جبر کا سامنا ہے۔
پاک سعودی دفاعی تعاون مضبوط اور جاری
ترجمان دفتر خارجہ کا کہنا تھا کہ پاکستان اور سعودی عرب کے درمیان دفاعی تعاون مضبوط، ہمہ جہت اور کثیرالجہتی نوعیت کا ہے۔ سعودی عرب سے کسی مخصوص دفاعی پلیٹ فارم یا قرض سے متعلق کسی حتمی معاہدے کی اطلاع نہیں ہے۔ کسی بھی ممکنہ دفاعی معاہدے کی تصدیق باضابطہ تکمیل کے بعد کی جائے گی۔
سعودی عرب میں مزید پاکستانی فوجیوں سے متعلق قیاس آرائیاں
ایک سوال کے جواب میں ترجمان نے کہا کہ سعودی عرب میں مزید پاکستانی فوجی بھیجنے کے کسی فیصلے کی معلومات نہیں۔ پاکستان اور سعودی عرب کے درمیان متعدد دفاعی منصوبے زیر غور ہیں تاہم فوجیوں کی تعداد میں اضافے سے متعلق قیاس آرائیوں پر کوئی تبصرہ نہیں کیا جا سکتا۔ دفاعی تعاون باہمی معاہدوں اور طے شدہ طریقہ کار کے تحت جاری رہتا ہے۔
