سابق را چیف بھی مودی کے خلاف کھل کر بول پڑے ،کشمیر میں بے بسی اور مایوسی کا راج ، مودی حکومت کو کشمیریوں کی کوئی پرواہ نہیں:  اے ایس دولت

نئی دہلی: بھارتی خفیہ ایجنسی ’را‘ کے سابق سربراہ اے ایس دولت نے کہا ہے کہ مقبوضہ کشمیر کی موجودہ صورتحال پر نریندر مودی کی حکومت کو کوئی خاص پرواہ نہیں، جبکہ کشمیری عوام شدید مایوسی اور بے بسی کا شکار ہیں۔

چنئی میں منعقدہ ایک لٹریچر فیسٹیول سے خطاب کرتے ہوئے اے ایس دولت نے کہا کہ کشمیر میں موجودہ سیاسی حالات میں بے بسی کا احساس غالب ہے اور نئی دہلی کشمیر اور کشمیریوں کے حالات سے عملاً لاتعلق دکھائی دیتی ہے۔ ان کا کہنا تھا کہ اس وقت کشمیر جمود کا شکار ہے اور کشمیری محض امید کے سہارے زندگی گزار رہے ہیں۔

سابق ’را‘ چیف نے کہا کہ اٹل بہاری واجپائی کے دور کی بی جے پی اور موجودہ نریندر مودی کی بی جے پی میں زمین آسمان کا فرق ہے۔ ان کے مطابق واجپائی حکومت کشمیر کے مسئلے کے حل میں سنجیدہ دلچسپی رکھتی تھی، جبکہ مودی حکومت کو اس معاملے سے زیادہ سروکار نظر نہیں آتا۔

آرٹیکل 370 کی منسوخی پر بات کرتے ہوئے اے ایس دولت نے کہا کہ کشمیریوں سے ایک علامتی سہارا بھی چھین لیا گیا ہے۔ انہوں نے کہا کہ آرٹیکل 370 کے خاتمے کے بعد جس بڑے عوامی ردعمل کی توقع کی جا رہی تھی وہ سامنے نہیں آیا، بلکہ کشمیری خاموش ہو گئے، اور یہی خاموشی زیادہ خوفناک ہے کیونکہ اس کے نتائج کا اندازہ لگانا مشکل ہے۔

فیسٹیول کے دوران بالی وڈ فلموں میں مسلمانوں کو منفی کرداروں میں پیش کیے جانے پر بھی شدید تنقید کی گئی۔ مقررین کا کہنا تھا

کہ بھارتی فلم انڈسٹری مسلمانوں کے خلاف نفرت کو فروغ دے رہی ہے اور معاشرے میں مذہبی تقسیم کا باعث بن رہی ہے۔