خوارج کو ہمسایہ ملکوں کی پشت پناہی حاصل، دہشت گردی کے خاتمے تک چین سے نہیں بیٹھیں گے: وزیر اعظم

کوئٹہ: وزیر اعظم شہباز شریف نے کہا ہے کہ دہشت گردی کے خلاف جنگ آج بھی پوری شدت سے جاری ہے اور خوارج کو ہمسایہ ملکوں کی جانب سے سپورٹ حاصل ہے، تاہم دہشت گردی کے مکمل خاتمے تک حکومت چین سے نہیں بیٹھے گی۔

کوئٹہ میں منعقدہ ایک اجلاس سے خطاب کرتے ہوئے وزیر اعظم نے کہا کہ وفاقی حکومت بلوچستان کی ترقی، استحکام اور عوامی فلاح کے لیے صوبائی حکومت کے ساتھ مکمل تعاون جاری رکھے گی۔ انہوں نے اس عزم کا اعادہ کیا کہ بلوچستان کو درپیش مسائل کے حل، ترقیاتی منصوبوں کی تکمیل اور عوام کو ریلیف کی فراہمی کے لیے تمام وسائل بروئے کار لائے جائیں گے۔

وزیر اعظم نے بلوچستان حکومت کی جانب سے صوبے میں ترقی کے فروغ، امن و امان کے قیام، سیاسی ہم آہنگی کے استحکام اور وزیر اعظم کمپلینٹ سیل پر درج عوامی شکایات کے مؤثر ازالے کے اقدامات کو سراہا۔

شہباز شریف کا کہنا تھا کہ دہشت گردی نے خیبر پختونخوا کی طرح بلوچستان میں بھی سنگین مشکلات پیدا کیں، تاہم معرکۂ حق میں دشمن کو ایسا سبق سکھایا گیا ہے جو وہ ہمیشہ یاد رکھے گا۔

اس سے قبل چیف سیکرٹری بلوچستان شکیل قادر خان نے وزیر اعظم کو صوبے میں مختلف شعبہ جات میں اصلاحات، ترقیاتی منصوبوں پر پیش رفت اور خصوصاً تعلیم، صحت، گورننس اور عوامی خدمات سے متعلق اقدامات پر تفصیلی بریفنگ دی۔