کابل: افغان دارالحکومت کابل کے علاقے شہرِ نو میں ہونے والے ایک زور دار دھماکے کے نتیجے میں متعدد افراد ہلاک اور زخمی ہو گئے ہیں، جس کے بعد علاقے میں خوف و ہراس پھیل گیا۔
غیر ملکی خبر رساں ایجنسی کے مطابق طالبان کی وزارتِ داخلہ کے ترجمان نے ابتدائی اطلاعات میں جانی نقصان کی تصدیق کی ہے، تاہم ہلاکتوں اور زخمیوں کی حتمی تعداد بعد میں جاری کی جائے گی۔
وزارتِ داخلہ کے ترجمان عبدالمتین قانی کا کہنا ہے کہ دھماکے کی وجوہات جاننے کے لیے تحقیقات جاری ہیں اور مزید تفصیلات جلد سامنے لائی جائیں گی۔
غیر ملکی خبر رساں ادارے کے مطابق شہرِ نو کا علاقہ غیر ملکیوں کی رہائش کے باعث جانا جاتا ہے اور اسے کابل کے نسبتاً محفوظ ترین علاقوں میں شمار کیا جاتا ہے، جس کی وجہ سے اس واقعے نے سکیورٹی صورتحال پر سوالات کھڑے کر دیے ہیں۔
