تہران: ایران میں جاری مظاہروں کے دوران جھڑپوں میں جاں بحق ہونے والے سکیورٹی اہلکاروں کی نماز جنازہ دارالحکومت تہران میں ادا کی گئی، جس میں ہزاروں افراد نے شرکت کی۔
نماز جنازہ کے دوران تہران یونیورسٹی کے اطراف کی سڑکیں جنازے میں شریک افراد سے بھری ہوئی تھیں۔ شرکاء کی بڑی تعداد نے ایرانی پرچم اور سپریم لیڈر آیت اللہ علی خامنہ ای کی تصاویر کے ساتھ اپنے جاں بحق عزیزوں کی تصاویر بھی اٹھا رکھی تھیں۔ایرانی پرچموں میں لپٹے تابوت بڑے ٹرکوں میں رکھے گئے تھے، جن پر سرخ اور سفید گلاب نچھاور کیے گئے۔
انسانی حقوق کی تنظیموں کا کہنا ہے کہ ایران میں گزشتہ دو ہفتوں کے دوران جاری بدامنی میں ہزاروں افراد ہلاک ہوئے ہیں، تاہم ان اعداد و شمار کی آزادانہ طور پر تصدیق ممکن نہیں ہو سکی۔ یہ مظاہرے ایران میں بڑھتی ہوئی اقتصادی مشکلات، سماجی کشیدگی اور سیاسی نارضایتی کے پیشِ نظر جاری ہیں۔
