ماسکو:روس نے گزشتہ شب یوکرین کے مختلف علاقوں پر بڑے پیمانے پر حملہ کیا، جس میں ڈرونز اور میزائلوں کے ساتھ ساتھ اوریشنک (Oreshnik) بیلسٹک میزائل بھی استعمال کیا گیا۔
یوکرینی حکام کے مطابق جمعرات کی شب دارالحکومت کیف میں کئی گھنٹوں تک زور دار دھماکوں کی آوازیں سنائی دیتی رہیں، حملے کے نتیجے میں کم از کم چار افراد ہلاک جبکہ 25 زخمی ہو گئے۔
روس کی وزارتِ دفاع کا کہنا ہے کہ یہ کارروائی دسمبر کے آخر میں یوکرین کی جانب سے مبینہ طور پر روسی صدر ولادیمیر پیوٹن کی رہائش گاہ کو نشانہ بنانے والے ڈرون حملے کے جواب میں کی گئی۔ تاہم روسی حکام نے یہ واضح نہیں کیا کہ اوریشنک میزائل کا اصل ہدف کیا تھا۔
مقامی وقت کے مطابق آدھی رات سے کچھ پہلے سوشل میڈیا پر ایسی ویڈیوز سامنے آئیں جن میں مغربی شہر لویو کے مضافات میں متعدد دھماکے دیکھے جا سکتے تھے۔ یوکرین کے صدر وولودیمیر زیلنسکی اور دیگر حکام نے تصدیق کی ہے کہ لویو میں کچھ تنصیبات کو بیلسٹک میزائل سے نشانہ بنایا گیا۔ یہ شہر پولینڈ کی سرحد سے تقریباً 60 کلومیٹر کے فاصلے پر واقع ہے۔
یہ دوسرا موقع ہے کہ روس نے اوریشنک میزائل استعمال کیا ہے، اس سے قبل نومبر 2024 میں اسی میزائل کے ذریعے یوکرین کے وسطی شہر دنیپرو کو نشانہ بنایا گیا تھا۔
ماہرین کے مطابق اوریشنک ایک درمیانے فاصلے تک مار کرنے والا ہائپرسونک بیلسٹک میزائل ہے جو ممکنہ طور پر ساڑھے پانچ ہزار کلومیٹر تک ہدف کو نشانہ بنانے کی صلاحیت رکھتا ہے۔ اس کا وارہیڈ آخری مرحلے میں کئی حصوں میں تقسیم ہو جاتا ہے، جو الگ الگ اہداف پر گر کر وقفے وقفے سے متعدد دھماکوں کا باعث بنتا ہے۔
یوکرین کے وزیرِ خارجہ نے اس حملے کو یورپی یونین اور نیٹو کی سرحد کے قریب یورپ کی مجموعی سلامتی کے لیے سنگین خطرہ قرار دیا ہے۔
