دمشق :اسرائیل اور شام نے امریکا کی ثالثی میں ایک خصوصی رابطہ نظام قائم کرنے پر اتفاق کر لیا ہے، جس کا مقصد انٹیلی جنس اور سفارتی رابطوں کو فروغ دینا، کشیدگی میں کمی لانا اور ممکنہ سکیورٹی معاہدے کی راہ ہموار کرنا ہے۔
اس حوالے سے امریکا، اسرائیل اور شام کی جانب سے مشترکہ بیان جاری کیا گیا ہے۔ بیان کے مطابق یہ خصوصی رابطہ سیل فوجی کشیدگی میں کمی، سفارتی روابط کے استحکام اور مستقبل میں تجارتی مواقع کے فروغ میں معاون ثابت ہوگا۔
مشترکہ بیان میں کہا گیا ہے کہ اسرائیل اور شام کے درمیان گزشتہ ایک سال سے وقفے وقفے سے مذاکرات جاری تھے، جن کا مقصد ایسا سکیورٹی فریم ورک تیار کرنا تھا جو اسرائیل کی جانب سے شام پر ہونے والے مسلسل حملوں کے خاتمے میں مدد دے سکے۔
بیان میں مزید کہا گیا ہے کہ یہ نیا میکنزم کسی بھی ممکنہ تنازعے کو فوری طور پر حل کرنے اور دونوں ممالک کے درمیان غلط فہمیوں سے بچاؤ کے لیے ایک مؤثر پلیٹ فارم کے طور پر کام کرے گا۔
یہ پیش رفت پیرس میں اسرائیلی اور شامی حکام کے درمیان ہونے والے حالیہ اجلاسوں کے بعد سامنے آئی ہے، جن میں شامی وزیر خارجہ نے بھی شرکت کی۔ ان ملاقاتوں میں سکیورٹی، علاقائی استحکام اور مستقبل کے روابط پر تفصیلی تبادلہ خیال کیا گیا۔
امریکا نے اسرائیل اور شام کے درمیان اس پیش رفت کو مشرق وسطیٰ میں دیرپا امن کی جانب ایک اہم قدم قرار دیتے ہوئے امید ظاہر کی ہے کہ اس سے خطے میں کشیدگی کم کرنے میں مدد ملے گی۔
