سوڈان میں ایک گھر پر ہونے والے ڈرون حملے کے نتیجے میں بچوں سمیت 13 افراد ہلاک ہو گئے۔ غیر ملکی میڈیا کے مطابق یہ حملہ سوڈان کے شہر العبید میں ایک رہائشی گھر کو نشانہ بنا کر کیا گیا۔
میڈیا رپورٹس میں بتایا گیا ہے کہ جاں بحق افراد میں 8 بچے بھی شامل ہیں جبکہ ہلاک ہونے والوں کی اکثریت ایک ہی خاندان سے تعلق رکھتی تھی۔ الجریدہ کے مطابق حملے کے بعد علاقے میں خوف و ہراس پھیل گیا اور مقامی افراد نے امدادی کارروائیاں شروع کیں۔
میڈیا رپورٹس کے مطابق یہ ڈرون حملہ فوج کے زیر کنٹرول علاقے میں کیا گیا، جس کا الزام نیم فوجی ریپڈ سپورٹ فورسز پر عائد کیا جا رہا ہے۔ تاہم تاحال کسی گروپ نے اس حملے کی ذمہ داری قبول نہیں کی۔
الجریدہ کے مطابق سوڈان میں فوج اور ریپڈ سپورٹ فورسز کے درمیان گزشتہ کئی سالوں سے شدید کشیدگی جاری ہے، جس کے نتیجے میں اب تک ہزاروں افراد جان کی بازی ہار چکے ہیں جبکہ لاکھوں شہری بے گھر ہو چکے ہیں۔
