ورلڈ لبرٹی فنانشل کے امریکی وفد کی فیلڈ مارشل عاصم منیر سے ملاقات، پاکستانی قیادت کی جدید ٹیکنالوجی اپنانے کی کوششوں کو سراہا
راولپنڈی: پاک فوج کے سربراہ فیلڈ مارشل سید عاصم منیر سے ورلڈ لبرٹی فنانشل کے امریکی وفد کی ملاقات ہوئی جس کا مقصد کراس بارڈر ڈیجیٹل فنانس اور مضبوط مالی شمولیت کے مواقع پر تبادلہ خیال تھا۔
آئی ایس پی آر کے مطابق وفد کی قیادت معروف گلوبل فن ٹیک فرم کے سی ای او زچری وٹکوف نے کی۔ ملاقات بین الاقوامی نجی سرمایہ کار گروپوں کی پاکستان میں ابھرتی ہوئی معاشی صورتحال میں دلچسپی کا مظہر ہے۔
وفد نے پاکستان میں جدید ٹیکنالوجی اپنانے کی قیادت کی کوششوں کو سراہا اور اقتصادی صلاحیت کے مکمل امکانات کو محسوس کرنے کی کوششوں کی تعریف کی۔
فیلڈ مارشل عاصم منیر نے وفد کے خیالات کے تبادلے کا خیر مقدم کرتے ہوئے پاکستان کے اقتصادی استحکام، سرمایہ کاروں کے اعتماد، اور قومی ترقی میں نجی شعبے کی فعال شرکت کے لیے سازگار ماحول فراہم کرنے کے عزم پر زور دیا۔
آئی ایس پی آر کے مطابق یہ ملاقات پاکستان کے فن ٹیک سیکٹر پر عالمی اعتماد بڑھنے اور سرمایہ کاری کے مواقع میں اضافے کا اشارہ بھی ہے۔
