امیرِ قطر کا وزیراعظم شہباز شریف سے ٹیلیفونک رابطہ، مشرقِ وسطیٰ کی صورتحال پر تبادلہ خیال

اسلام آباد: قطر کے امیر شیخ تمیم بن حمد الثانی اور وزیراعظم پاکستان  شہباز شریف کے درمیان ٹیلیفونک رابطہ ہوا ہے، جس میں مشرقِ وسطیٰ کی حالیہ صورتحال اور خطے میں جاری پیش رفت پر تفصیلی تبادلہ خیال کیا گیا۔

وزیراعظم آفس کے مطابق امیرِ قطر نے  وزیراعظم شہباز شریف کو ٹیلیفون کیا۔ گفتگو کے دوران دونوں رہنماؤں نے پاک قطر تعلقات کی موجودہ رفتار پر اطمینان کا اظہار کیا اور دوطرفہ تعاون کو مزید مضبوط بنانے کے عزم کا اعادہ کیا۔

ٹیلیفونک گفتگو میں مشرقِ وسطیٰ میں جاری حالیہ پیش رفت بھی زیرِ بحث آئی۔ وزیراعظم شہباز شریف نے خطے میں مذاکرات اور ثالثی کے عمل میں قطر کے فعال کردار کو سراہتے ہوئے کشیدگی کم کرنے کے لیے قطر کی بامعنی کوششوں کا اعتراف کیا۔

وزیراعظم آفس کے مطابق وزیراعظم شہباز شریف نے اس موقع پر کہا کہ پاکستان علاقائی امن و استحکام کے لیے اپنا مثبت اور تعمیری کردار ادا کرتا رہے گا۔ دونوں رہنماؤں نے باہمی دلچسپی کے امور پر قریبی رابطے میں رہنے پر بھی اتفاق کیا۔