لاہور:پنجاب حکومت کی جانب سے شوگر سیس کے نفاذ کے بعد لاہور کی اوپن مارکیٹ میں چینی کی قیمت میں 10 روپے فی کلو اضافہ ہو گیا ہے، جس کے بعد چینی 160 روپے فی کلو میں فروخت ہو رہی ہے۔
مارکیٹ ذرائع کے مطابق شوگر سیس کے باوجود چینی کی قیمت 150 روپے فی کلو ہونی چاہیے تھی، تاہم مختلف عوامل کے باعث قیمت اس سے تجاوز کر گئی ہے۔
اکبری منڈی میں چینی کا 50 کلو وزنی تھیلا اضافے کے بعد 7 ہزار 500 روپے میں فروخت ہو رہا ہے، جبکہ چینی کا ایکس مل ریٹ 135 روپے فی کلو بتایا جا رہا ہے۔کریانہ مرچنٹ ایسوسی ایشن کا کہنا ہے کہ مارکیٹ میں چینی وافر مقدار میں موجود ہے اور قلت کی کوئی صورتحال نہیں۔
حکومت پنجاب نے یکم جنوری سے 40 کلو چینی پر 5 روپے شوگر سیس نافذ کیا ہے، جس میں سے ڈھائی روپے شوگر مل جبکہ ڈھائی روپے کسان ادا کرے گا۔ شوگر سیس کے نفاذ کے بعد چینی کی قیمتوں میں اضافے پر صارفین کی جانب سے تشویش کا اظہار کیا جا رہا ہے۔
