وزیراعظم کی زیرِ صدارت دور دراز علاقوں میں بلا تعطل بجلی کی فراہمی کیلئے سولرائزیشن پر اعلیٰ سطح اجلاس

اسلام آباد: وزیراعظم  شہباز شریف کی زیرِ صدارت ملک کے دور دراز علاقوں میں بجلی کی بلا تعطل فراہمی اور بجلی کے شعبے میں جاری اصلاحات کے حوالے سے اعلیٰ سطحی جائزہ اجلاس  منعقد ہوا۔

اجلاس میں وزیراعظم نے ہدایت کی کہ زیادہ خسارے میں چلنے والے بجلی کے فیڈرز کو کمیونٹی اور صوبائی حکومتوں کے تعاون سے شمسی توانائی پر منتقل کیا جائے۔ انہوں نے کہا کہ اس اقدام سے نہ صرف نقصانات میں نمایاں کمی آئے گی بلکہ ان علاقوں میں بجلی کی مسلسل اور قابلِ اعتماد فراہمی بھی ممکن ہو سکے گی۔

وزیراعظم نے خصوصی طور پر پیسکو (PESCO) اور قیسکو (QESCO) کے زیادہ نقصان میں چلنے والے فیڈرز میں فوری طور پر پائلٹ پراجیکٹس شروع کرنے کی ہدایت دیتے ہوئے کہا کہ ان منصوبوں کی کامیابی کیلئے علاقے کے منتخب نمائندوں سے مشاورت اور مقامی کمیونٹی کی شمولیت کو یقینی بنایا جائے۔

اجلاس کو پیسکو اور قیسکو کے خسارے میں چلنے والے فیڈرز کو شمسی توانائی پر منتقل کرنے کے منصوبے پر تفصیلی بریفنگ دی گئی۔ بریفنگ میں بتایا گیا کہ ان فیڈرز کی سولرائزیشن سے مقامی آبادی کیلئے ماحول دوست، کم لاگت اور پائیدار مائیکرو گرڈ قائم ہوں گے، جن میں مقامی آبادی کے ساتھ ساتھ صوبائی اور وفاقی حکومتیں بھی شراکت دار ہوں گی۔

اجلاس کو مزید بتایا گیا کہ اس منصوبے کے تحت کم لاگت بجلی کی پیداوار ممکن ہوگی جبکہ مستقبل میں بجلی کی تقسیم کار کمپنیوں کے مجموعی خسارے میں نمایاں کمی آئے گی۔ منصوبے کی اصولی منظوری دیتے ہوئے وزیراعظم نے ہدایت کی کہ خیبر پختونخوا اور بلوچستان میں پائلٹ پراجیکٹس پر فوری طور پر عملی کام کا آغاز کیا جائے۔

اجلاس میں نائب وزیراعظم و وزیر خارجہ سینیٹر محمد اسحاق ڈار، وفاقی وزیر برائے بجلی سردار اویس احمد خان لغاری، وفاقی وزیر برائے پٹرولیم علی پرویز ملک، وزیر مملکت برائے خزانہ بلال اظہر کیانی، خیبر پختونخوا اور بلوچستان کے چیف سیکرٹریز سمیت متعلقہ اعلیٰ سرکاری حکام نے شرکت کی۔