ریاض/عدن: سعودی عرب کی قیادت میں قائم یمن کے فوجی اتحاد نے دعویٰ کیا ہے کہ علیحدگی پسند سدرن ٹرانزیشنل کونسل (ایس ٹی سی) کے سربراہ عیدروس الزبیدی یمن سے فرار ہو گئے ہیں۔
یو اے ای پر خفیہ انخلا میں کردار کا الزام
سعودی اتحاد کے مطابق عیدروس الزبیدی صومالی لینڈ کے راستے متحدہ عرب امارات فرار ہوئے، جبکہ انہیں خفیہ طور پر یمن سے نکالنے میں یو اے ای نے کردار ادا کیا۔ سعودی اتحاد کا کہنا ہے کہ یہ اقدام یمن میں جاری صورتحال کے تناظر میں کیا گیا۔
بحری جہاز اور طیارے کے ذریعے روانگی کی تفصیلات
عرب میڈیا کے مطابق سعودی اتحاد نے جمعرات کو جاری بیان میں کہا کہ عیدروس الزبیدی بدھ کی شب عدن سے ایک بحری جہاز کے ذریعے روانہ ہوئے، جو یمن سے صومالی لینڈ کی بندرگاہ بربرہ پہنچا۔ بعد ازاں الزبیدی اماراتی افسران کے ہمراہ ایک طیارے میں سوار ہو کر صومالیہ کے دارالحکومت موغادیشو روانہ ہوئے۔
ٹرانسپونڈر بند کرنے کا دعویٰ
بیان میں کہا گیا ہے کہ طیارے نے خلیجِ عمان کے اوپر اپنی پرواز کے دوران ٹرانسپونڈر بند کر دیا تھا، جو ابو ظبی کے الریف فوجی ہوائی اڈے پر لینڈنگ سے تقریباً دس منٹ قبل دوبارہ فعال کیا گیا۔
ایس ٹی سی اور یو اے ای کا ردِعمل سامنے نہیں آیا
عرب میڈیا کے مطابق اس معاملے پر تاحال نہ سدرن ٹرانزیشنل کونسل اور نہ ہی متحدہ عرب امارات کی جانب سے کوئی باضابطہ ردِعمل سامنے آیا ہے۔
صومالیہ میں تحقیقات کا آغاز
ادھر صومالیہ کے امیگریشن حکام نے بیان میں کہا ہے کہ وہ ایسی اطلاعات کی تحقیقات کر رہے ہیں جن میں ایک ’مفرور سیاسی شخصیت‘ کی نقل و حرکت کے لیے صومالیہ کی فضائی حدود اور ہوائی اڈوں کے مبینہ غیر مجاز استعمال کا ذکر کیا گیا ہے۔
یمن میں ایس ٹی سی کے خلاف کارروائیاں تیز
سدرن ٹرانزیشنل کونسل نے ابتدا میں شمالی یمن کے حوثی باغیوں کے خلاف یمن کی بین الاقوامی طور پر تسلیم شدہ حکومت کا ساتھ دیا تھا، تاہم بعد ازاں جنوبی یمن میں علیحدہ ریاست کے قیام کی حمایت شروع کر دی۔
سعودی اتحاد کے مطابق ایس ٹی سی کے خلاف کارروائیاں تیز کر دی گئی ہیں اور یمن کی حکومتی فورسز نے ایس ٹی سی کے کنٹرول میں موجود عدن شہر اور وہاں واقع صدارتی محل کا کنٹرول واپس حاصل کر لیا ہے۔
