الیکشن کمیشن نے پنجاب کی مخصوص نشستوں پر محفوظ فیصلہ سنا دیا
لاہور (نیوزڈیسک) الیکشن کمیشن آف پاکستان نے پنجاب کی مخصوص نشستوں پر محفوظ فیصلہ سنا دیا،الیکشن کمیشن نے پی ٹی آئی کی مخصوص نشستوں کا نوٹیفکیشن روک دیا ہے، مخصوص نشستوں کا نوٹیفکیشن ضمنی الیکشن کے نتائج کے بعد جاری ہوگا۔ میڈیا رپورٹس کے مطابق چیف الیکشن کمشنر کی سربراہی میں 5 رکنی کمیشن نے درخواست کی سماعت کی، سماعت کے دوران فریقین کے وکلاء کے دلائل اور جواب الجواب لیے گئے تھے،الیکشن کمیشن نے تحریک انصاف اور ن لیگ کے وکلاء کے دلائل سننے کے بعد فیصلہ محفوظ کیا تھا،اٹارنی جنرل اشتراوصاف اور ایڈووکیٹ جنرل پنجاب شہزاد شوکت بھی پیش ہوئے،الیکشن کمیشن آف پاکستان نے پنجاب کی مخصوص نشستوں پر محفوظ فیصلہ سنا تے ہوئے پی ٹی آئی کی مخصوص نشستوں کا نوٹیفکیشن روک دیا ہے، مخصوص نشستوں کا نوٹیفکیشن ضمنی الیکشن کے نتائج کے بعد جاری ہوگا۔
یاد رہے پنجاب اسمبلی کے 25 منحرف ارکان اسمبلی کو الیکشن کمیشن نے ڈی نوٹیفائی کیا تھا، برطرف ارکان اسمبلی میں 20جنرل نشستیں اور 5 مخصوص نشستوں کے ارکان شامل تھے، مخصوص نشستوں میں تین خواتین اور دو اقلیتوں کی نشستیں شامل تھیں۔ڈی سیٹ ہونے والوں میں عائشہ نواز اور ساجدیوسف شامل تھیں۔ دوسری جانب پاکستان تحریک انصاف نے نئی انتخابی حلقہ بندیوں پر تحفظات کا اظہار کردیا۔
پی ٹی آئی وائس چیئرمین شاہ محمود قریشی نے آج یہاں گفتگو کرتے ہوئے کہا کہ الیکشن کمیشن میں ایک اہم کیس کا فیصلہ تھا، آج اس کیس کے فیصلے کو محفوظ کیا گیا ہے، ملک میں شفاف الیکشن کروانا الیکشن کمیشن کی ذمہ داری ہے، پورے ملک کی نظرالیکشن کمیشن پر ہے، لیڈرآف اپوزیشن نہ ہونے کے برابر ہے، اپوزیشن لیڈر نے کہا (ن) لیگ کی ٹکٹ پر الیکشن لڑوں گا، الیکشن کمیشن میں2 نئے ممبران کی تعیناتی کی گئی، یہ فیصلہ لیڈرآف اپوزیشن سے مل کر کیا جانا تھا، موجودہ لیڈر آف اپوزیشن کی کوئی قانونی حیثیت نہیں ہے، چیف جسٹس نے الیکشن کمشنر سے الیکشن کروانے کا پوچھا، اس وقت الیکشن کمیشن نے7 مہینے کا وقت مانگا۔
شاہ محمود قریشی نے کہا کہ اب الیکشن کمشنر کہتے ہیں جب حکومت کہے گی الیکشن کروا دیں گے، حلقہ بندیوں کے لیے مردم شماری کرنا ضروری ہے، تاحال مردم شماری نہیں کی گئی، فاٹا کی 12 سیٹوں کو 6 کرنے کے لیے یہ عمل کیا گیا، حلقہ بندیوں میں ازسرنو تبدیلیاں کی گئی ہیں، نئی حلقہ بندیاں ذاتی مقصد کے لیے کی گئی ہیں، نئی حلقہ بندیوں کا فائدہ کس کو ہوگا سب جانتے ہیں۔
