اسلام آباد: ڈپٹی وزیراعظم و وزیر خارجہ اسحاق ڈار نے آزاد جموں و کشمیر کے موجودہ اور سابق وزرائے اعظم سے ملاقات کی، جس میں آزاد کشمیر کے ترقیاتی منصوبوں پر تفصیلی تبادلہ خیال کیا گیا۔
اسحاق ڈار نے گفتگو کرتے ہوئے کہا کہ آزاد کشمیر کی سماجی و اقتصادی ترقی کے لیے حکومت کا بھرپور تعاون جاری رہے گا اور ترقیاتی منصوبوں کی رفتار تیز کرنے کے عزم کا اظہار کیا۔ آزاد کشمیر کی ترقی و خوشحالی حکومت کی اولین ترجیحات میں شامل ہے اور اس کے عوام کو بہترین سہولیات فراہم کرنے پر زور دیا۔
ملاقات میں وزیراعظم آزاد کشمیر چوہدری انوار الحق، سردار عتیق احمد خان اور راجہ فاروق حیدر خان سمیت دیگر اہم شخصیات نے شرکت کی۔اجلاس میں چیف سیکرٹری اور آئی جی آزاد کشمیر بھی موجود تھے۔
اجلاس میں آزاد کشمیر کے ترقیاتی منصوبوں اور عوامی مسائل پر تفصیلی غور کیا گیا اور تمام اسٹیک ہولڈرز نے آزاد کشمیر کی ترقی کے لیے بھرپور تعاون پر اتفاق کیا۔
